Fungsi Ghibah Bagi Tatanan Sosial

Ghibah punye manfaat? Masa sih? (Sumber)
Sejak ada Instagram pasti pengetahuan ghibah kalian jadi makin meluas, bener kagak? Ditambah adanye tulisan #INCROT yang kerap hadir di blog ini dan menjadi salah satu topik yang selalu dinantikan. Ngaku aje udeh luuuhhh!

Konon ghibah ntu dosa, bahkan dosanye setara dengan makan daging seseorang. Tapi gue bersyukur menjadi vegetarian yang kagak mungkin makan daging, jadi mungkin dosa ghibah gue kagak terhitung oleh malaikat dan Tuhan. Hehehe, becanda, gaes. Yaelah, masih kaku aje.

Bagi gue, hanya manusia hipokrit lah yang menyatakan kagak doyan ghibah. Percayalah bahwa semua manusia di jaman sekarang demen ghibah, terlebih jika si manusianye demen maen internet. Mau terhindar dari ghibah, ya mane bisa, kan. Dan bagi gue, ghibah pun ada tata caranye. Misal : kagak ngomongin kejelekan fisik dan penampilan orang. At least hal satu ntu dilakuin, lah.

Kalo dipikir-pikir, ghibah ntu sebenernye ada fungsinye, coy.

1. Mengetahui bahwa public figure tuh manusia biasa

Camkan ntu!!!!
Sama-sama makan nasi. Bisa kentut dan bau banget. Bisa mencret. Cuman kagak dipublikasikan aje. Yakinlah bahwa mereka tuh sama kayak kite. Soal drama, toh tiap manusia punye drama kehidupannye masing-masing. Bedanye kalo drama artis ya masuk media massa, sedangkan kite paling di IG story wqwq. Drama artis ya ada duitnye. Sedangkan kite belom tentu dramanye menghasilkan duit huhuhu (kecuali lo mau jadi kayak Awkarin).

Public figure tuh punye kesabaran yang terbatas. Kalo dikatain, ya bisa aje doi marah. Jangan sampe kite beranggapan bahwa mereka tuh kudu sabar menanggapi jempol jahat netijen. Yailah... sabar dari Hongkong, kite sendiri pun kalo dikatain netijen pasti akan membela diri, kan?

2. Bisa belajar dari kehidupan public figure

Belajar banyak dari mereka :') #IYKWIM (Sumber Gambar)
Lucu aje sih kalo kite ngikutin kehidupan public figure dari titik nol mereka. Yang tadinye punye kehidupan yang bebas banget, pas tua jadi sakit-sakitan parah. Bikin kite belajar bahwa kesehatan tuh penting, janganlah banyak minum alkohol dan sembarangan ngeseks.

Yang tadinye ngerasa keluarga X bahagia, eh gegara orang ketiga jadi pecah belah. Abis ntu dapet karma, jadi miskin semiskin-miskinnye. Bikin kite belajar bahwa kesetiaan tuh mahal. Karma ntu ada. Jangan suka nyakitin pasangan, entar disakitin balik baru tau rasa. Hmmm, if you know what I mean.

3. Nongkrong kagak cuman jadi ajang maen hape doang

Ngapain coba udeh cape-cape ngajakin nongkrong eeeh pas ketemu malah cuman numpang hape doang! Sumber Gambar.
Jujur nih ye, ketimbang ghibah ngomongin temen, mending ghibah ngomongin artis deh. Tapi tetep jangan ujung-ujungnye body-shaming. Ghibahnye tuh semacem berbagi info aje soal drama yang lagi ngehits. Ada ape sih gitu, misal drama artis yang cerai gegara si suami ketahuan gay. Nah, bisa kite ambil tuh intisarinye bahwa kite kudu mengenali calon pasangan sampe ke akar-akarnye. Jangan sampe kepatil intinye mah!

Jujur aje gue suka sebel kalo pas nongkrong berujung pada maen hape doang. Sebenernye sih bisa aje gue yang mulai membuka topik, tapi males juga kalo gue selalu inisiatif terus-terusan. Kalo kejadiannye kayak gitu sih, gue biasanye langsung pulang aje. Btw nongkrong model gini kagak berlaku kalo ketemuannye ame temen deket yang lebih asik dan kagak inget waktu tiap ketemu. Biasanye nongkrong kagak jelas tuh ditemui di berbagai komunitas. Mangkenye sekarang gue suka males kalo nongkrongnye berisi banyak orang, mending nongkrongnye cuman berdua bertigaan biar intim.

4. Jadi tau bahwa janganlah kite mendewakan public figure

Yoi mamen, mangkenye kenape gue bikin rubrik #INCROT biar kalian tuh kagak dibutakan oleh pencitraan public figure di luar sono! Cukuplah apresiasi karya mereka, tapi jangan mendewakan mereka seolah-olah mereka kagak pernah punye dosa.

Janganlah kaget kalo ada pemuka agama yang sebenernye biseks, toh mereka bukan nabi, hanya manusia biasa, dan mungkin jadi agamis demi mendapatkan duit. Walau sangat disayangkan, emang. Ya, ambil yang baek-baeknye aje, dah.

Janganlah kaget kalo ada selebgram yang citranye positif banget tapi sebenernye demen nidurin penggemar. Modus kayak gini udeh ada sejak jaman jebot, coy. Maka dari ntu, ambil aje yang positifnye, jangan yang jeleknye. Kalo selebgram junjungan ada kasus, ya mending tetep kasi dukungan aje biar mereka kembali berkarya, jangan malah nge-bully dan bikin mereka depresi.

"Duh Mpok, jadi kangen #INCROT lo terbaru, deh. Mane nih?"
Nih, klik aje di sini 😈

5. Sebagai batasan diri

Kagak mau dighibahin? Ya jangan suka posting masalah pribadi ke publik. Ya jangan aneh-aneh di dunia nyata. Ya jangan jahat ke orang. Ya jangan hidup wkwk karena walaupun kite selalu menampilkan yang terbaek pasti ada aje kejelekan kite yang diomongin orang. Ape lagi artis! Ya yang penting selalu meminimalisir kejelekan diri di ruang publik lah intinye. Sape tau di masa mendatang kite menjadi salah satu tokoh publik terkenal. Sape tau loh, coy!

--

Sekian tulisan gue kali ini, menurut kalian fungsi ghibah ntu ape aje sih? Plis komen di bawah eaaa~~~





irvina lioni

Irvina Lioni atau biasa disebut Mpok Pina, telah menjadi blogger sejak tahun 2010. Dikenal sebagai blogger Betawi yang nyablak dan berani menyuarakan melalui tulisan di blog dan status media sosialnya.

Comments
1 Comments

1 comment:

  1. Jadi Kapan nongkrong lagi nih pin? terus gosipin artis2 wkwkwkwkw

    ReplyDelete

Gih kasi komen. Asal jangan nyebelin, berbau SARA dan porno ye. Yang SPAMMING bakal gue HAPUS.

Makasi temen-temen. HAPPY BLOGGING! :*