Pengalaman Gue Saat Pergi ke Dukun

Yup, gue akui gue pernah ke dukun. Tapi waktu masih kecil dulu, sekitar saat gue masih berumur 9 tahun. Ngapain gue ke dukun? Minta jodoh? Yakali, dapet mens aje belom. Minta duit? Tenang, bokap gue horang kayah, gue tinggal minta ke diye (songong huahaha). 

Dahulu kala, salah satu sodara gue demen banget pergi ke dukun. Bukan buat minta tuyul, melainkan buat bikin pelet-peletan. Termasuk, bertujuan untuk mengawasi pasangannye. Ape lagi, akhir-akhir ntu, suaminye tetiba sering pulang malem. Alhasil, si sodara gue ntu suka curigaan dan kepo banget kepengen tau suaminye kayak bijimane di luar sono. 

Sebagai salah satu ponakan unyu yang emang sering diajak kemane-mane, gue pun tetiba diajak dong ke suatu tempat. Diye sih awalnye bilang mau ngajak gue ke pasar malem. Tapi tauknye, diye malah ngajakin ke kampung sebelah. Melewati banyak semak-semak dan jalan setapak. Hingga tiba di suatu tanah lapang nan sepi, ada satu pohon kapas gedeee banget. Di bawahnye ada semacem gubuk. Kite pun masuk ke gubuk. Dan gue seketika merinding.

Di dalem gubuk, yang namanye penerangan tuh minim banget. Di dinding-dindingnye banyak terpajang semacem benda pusaka. Sebenernye gue takut, tapi ape boleh buat. Mau keluar pun gue takut, karena di luar gelap juge. Belom lagi melihat gedenye si pohon kapas yang menurut gue pasti ditunggui oleh sosok-sosok serem macem mas genderuwo.

Si sodara gue beserta si dukun masuk ke salah satu ruangan. Sedangkan gue  duduk sambil menunggu di ruang tamu. Gue memejamkan mata. Dan tertidur.

Sekitar setengah jam kemudian, si sodara gue ngebangunin dan ngajak gue balik. Sambil jalan, beliau ngomong, "Kata si Mbah, nanti suamiku akan terlihat pas kita lagi jalan balik. Katanya sih sambil bawa cewek!"

Gue mah cuman bisa ape coba... ya cuman dengerin aje kan. Bingung mau ngomong apaan -_-

Dan bener juge kate si Mbah...

Tetiba kite nemuin suami sodara gue lagi berhentiin Ninjanye di pinggir jalan. BARENG CEWEK SEKSI BANGET ANJROOOTTT!

Seketika sodara gue ngelabrak tuh cewek. Saling jambak-jambakan. Sayang sekali gue belom punye iPhone ye khan, kalo udeh mah, gue rekam aje tuh, gue share ke pesbuk. Huahahaha :))

Mereka bertiga pun berantem di pinggir jalan, sampe jalanan jadi rame dan macet. Kagak lama, pak satpam dateng dan bawa mereka bertiga ke pos RW. Rame banget tuh pos RW, udeh kayak kumpulan warga ngantri duit sedekahan. Gue mah cuman bisa liat dari kejauhan terus maen bola bekel di teras rumah. Muahahahaha :))

Yang bikin gue takut sih cuman satu: apakah gue berdosa pergi ke dukun? Huhuhu :'(

Gue sih kagak tau tuh dukun masih tinggal di kampung sebelah ape kagak. Jadi pengen ke sono, deh, buat silaturahmi, sambil nanyak ke si Mbah, "Mbak, masih inget aye kagak?" Ada yang mau nemenin kagak nih? :p

(Entahlah kenape gue random mau ngomongin ginian di blog, maap postingan ini kagak berbobot wakakakak) :p