Kenape Makin Lama Makin Susah dan Males Ketemu Temen Lama?

Makin Lama Makin Susah dan Males Ketemu Temen Lama
Ngerasa makin lama makin susah dan males ketemu temen lama? (Sumber foto)
Seiring bertambah usia, maka kalian akan merasakan perubahan lingkungan pertemanan. Bener kagak? Mungkin jaman sekolah dulu, maennye ame temen yang satu sekolahan terus. Tapi sekarang, kayaknye kudu nunggu mujizat dulu biar bisa maen ame temen sekolah dulu. Yang ada kite kebanyakan bergaul ame orang-orang baru, entah dari komunitas, hingga temen kerja.

Daripade gue banyak bacot, berikut gue jabarin poin-poin alasan kenape kite semua makin lama makin susah dan males ketemu ame temen lama.

1. Perubahan Prioritas

Makin Lama Makin Susah dan Males Ketemu Temen Lama
Hmm, reunian, yah? Tapi udah ada janji sama klien~~~
Mungkin jaman sekolah dulu, kalian ngerasa bahwa temen adalah segalanyaaahhh. Biasanye sih, abege-abege tuh paling males ada di rumah, lebih enak maen ame temen, nongkrong ampe pagi.

Tapi seiring waktu, pasti setiap orang berubah. Dari yang memiliki pandangan bahwa temen itu nomer satu, jadi berganti : karir nomer satu, pasangan nomer satu, keluarga nomer satu, dll.

Makin Lama Makin Susah dan Males Ketemu Temen Lama
Absen reunian deh bro, ada urusan keluarga (padahal lagi ngewong ame cewe baru)
Jadi, jangan heran kalo makin lama, ngumpul tuh makin susah. Makin lama makin susah ngajakin temen buat bukberan di bulan puasa. Ya karena prioritas mereka tuh bukan kalian lagi. Prioritas mereka udeh berganti. Toh, sebagian dari kalian pasti akan ngerasa begitu, kan? Kayaknye emang jalan hidupnye, manusia bakal kayak gitu.

Yaaaa asal jangan sampe prioritasnye bikin ngelupain temen atau males bertemen lagi. Sesekali deh nongki walau cuman sejam-dua jam, walau cuman di Indomaret. Karena nongki kagak kudu mahal.

2. Temen jualan terus

Makin Lama Makin Susah dan Males Ketemu Temen Lama
Jualan mulu, kagak takut di-unfollow?
Di grup, jualan. Di socmed, jualan. Yang ngeselin, misalnye kite minta rekomen obat jerawat nih di status socmed, eh tau-tau temen kite komen dan promoin barang jualannye. Mending kalo barangnye aman, yang kite tau malah ntu barangnye udeh terdaftar sebagai obat berbahaya.

Kalo kayak gini, jadinye males mau ketemu temen macem ntu. Karena pas kopdar, pasti ujung-ujungnye doi jualan.

Jadi, buat temen-temen yang kebanyakan jualan, jangan suudzon temen-temen kalian jadi sombong. Tapi ngaca, soalnye kalian sendiri yang udeh bikin kagak nyaman mereka. Cari duit sih cari duit, tapi jangan jualan mulu yang diurusin. Bikin akun berbeda, khusus kehidupan personal dan jualan, demi kenyamanan bersama. Atau kalopun mau jualan di akun personal, yaaa jangan kebanyakan konten jualan, diselingin laaah ame konten yang menghibur.

3. Ideologi yang udeh berbeda

Makin Lama Makin Susah dan Males Ketemu Temen Lama
Kita sudah berbeda, kamu anak Bank sedangkan aku Selebgram~~~
Pas jaman abege, suka dugem bareng. Eeeeh pas udeh dewasa, temen dugem bareng udeh pade hijrah. Nah, jadi deh bikin jarang bergaul dengan doi. Karena ideologinye udeh beda, yang satu masih pengen seneng-seneng, yang satu udeh takut dosa.

Kalo di socmed, biasanye tuh pas udeh pade berbeda pandangan soal politik. Saling sindir, berantem di kolom komentar, lalu berakhir memutuskan pertemanan di dunia maya dan nyata. Tiap ada reuni, males dateng. Hayooo, ngalamin yang kayak gini kagak?

4. Kebusukan yang lama-lama tercium

Makin Lama Makin Susah dan Males Ketemu Temen Lama
Sikap lu pas ketemu temen nyebelin
Kalo soal diomongin di belakang, ntu sih udeh biasa kayaknye. Nah, banyak tuh temen-temen gue yang pade kagak sobatan lagi ame seseorang gegara utangnye kagak dibayar-bayar. Malah ada juge yang duitnye dibawa kabur pas sobatnye ntu ngajakin MLM atau ikutan tur. Yang kayak gini nih, bikin pade tercerai berai, pade males kumpul-kumpul karena mereka jadi kagak percaye ame yang namanye temen. Padahal kagak semua orang kayak begono, kan.

5. Masing-masih udeh nemuin temen baru yang lebih bikin nyaman

Makin Lama Makin Susah dan Males Ketemu Temen Lama
Temen baru terkadang lebih bikin nyaman~~~
Kayak ape sih temen yang bikin nyaman?

  • Kagak suka jelek-jelekin kite di belakang
  • Punye banyak kesamaan dari sisi ideologi, hobi, dll
  • Punye wawasan luas sehingga pas ngobrol kagak kehabisan topik dan ngerasa krik-krik
  • Kagak rempong
  • Woles
  • Di socmed kagak suka menyebar ujaran kebencian dan konten hoax
  • Kagak halu dan kagak suka panjat sosial
  • Kagak melakukan tindakan kriminal
---

Nah, sebelom kalian suudzon bahwa banyak temen kalian yang sombong, coba ngaca dulu. Ada kagak sikap kalian yang kayak di atas? Kagak harus semua, tapi salah satu poin, deh.

Kadang gue gatel aje gitu kalo ada salah satu temen lama bilang gue sombong karena susah diajak ketemuan, karena emang waktunye belom pas, karena pada saat ntu ada prioritas yang kudu dikerjain. Sedangkan pas gue yang tentuin jadwal ketemuannye, si temen onoh yang kagak bisa dengan alasan entah ape laaah. Sampe lebaran monyet kagak ketemuan dah tuh. Sering kan terjadi? wqwq.

Walau begitu, gue pribadi kagak pernah sama sekali ada niatan untuk menjauhi temen-temen lama sih, karena kagak pernah ada keributan, masih woles-woles aje. Toh, bagi gue, temen lama tuh yang paling seru dan ngertiin kite, karena gue dan mereka sama-sama berada di titik terendah bareng-bareng.

Namun karena mereka semua udeh pade ada prioritas tertentu, sehingga pade susah buat dikumpulin, apelagi diajak bukber~~~ Yaaa, nanti seiring umur, kalian bakal ngerasain deh.




irvina lioni

Irvina Lioni atau biasa disebut Mpok Pina, telah menjadi blogger sejak tahun 2010. Dikenal sebagai blogger Betawi yang nyablak dan berani menyuarakan melalui tulisan di blog dan status media sosialnya.

Comments
3 Comments

3 comments:

  1. kalo ane ngalamin dan berasa banget yang perubahan prioritas sih mpok. berasa banget, agak geli-geli enak gitu rasanya mpok :D wkwkwkwk

    ReplyDelete
  2. Kalau gue sih ngerasain banget yang nomer 1 sama nomer 4, mpok. Ngerasain gimana rasanya temen punya pacar dan mainnya bareng pacar melulu. Selain itu, nomer 4 juga ngena banget mpok. Mungkin karena gue orangnye introvert yang cenderung pendiem dan jalan hidupnye lurus-lurus aje, jadi dirasa-rasa kurang asik. Eh pas temen gue ketemu yang lebih cocok, gue udah jarang di hubungin.
    Tapi pernah juga ntu, gue negor teman lama pas SMA. Eh si temen malah pura-pura lupa, kan kesel mpok. Semenjek itutuh, gue lebih milih pura-pura nggak liat kalau ketemu temen lama, kecuali mereka yang negor duluan.

    ReplyDelete

Gih kasi komen. Asal jangan nyebelin, berbau SARA dan porno ye. Yang SPAMMING bakal gue HAPUS.

Makasi temen-temen. HAPPY BLOGGING! :*