Mengintip ‘Daleman’ Para Pemuka Agama Ternama

Mamah Dedeh

Lagi kangen sama Uje

Aduh, cape deh!

Udeh malem Minggu aje!

Kagak berase udeh malem Minggu, etdah! Pegimane ini yang kagak punye pasangan, pade galau-galau kagak noh? Mendingan kagak usah galau dah ye, ngapain, mending juge bace Qur’an, iye kagak *tsaaah, lagi alim nih*

hayooo, mau pilih yang mane nih?

Ngemeng-ngemeng nih, tangan gue gatel pengen nulis sesuatu. Pengen ngomongin soal DALEMAN orang-orang yang udeh gue sebutin di judul atas sono noh. Eits, tapi jangan mikir jorok dulu, ye! Daleman yang gue maksud bukan seputar beha ama kancut, melainkan tentang kehidupan sebenernye mereka ntuh.

Bukan maksud mau ngejelekin aje nih, ye. Gue sekadar pengen cerite-cerite aje. Dijadiin pelajaran aje, ye. Ambil hikmahnye... Lakuin yang positip, hindari yang negatip. Oke?

Seperti yang udeh kite tau kalo dimane-mane pemuka agama ntu pasti dihormati dan dihargai. Pas ketemu, salim. Pas mereka lagi ceramah, dipantengin. Betul kagak?

Gue jadi keinget sama ustad-ustad yang pernah ngajarin gue ngaji. Meski mereka ustad-ustad muda, namun ketegasannye ntu sungguh luar biase bener! Mereka pun sangat santun serta selalu hidup di dalem kesederhanaan. Kalo ngajarin ngaji juge kagak pernah matok tarif, seikhlasnye gue dan santri laen aje gitu. Mereka juga baek, soalnye suka teraktir gue makan. Umm, sebenernye sih teraktiran tersebut sebagai ucapan terimakasih mereka kepada gue yang suka bantuin ngajar ngaji anak-anak SD. Kira-kira waktu ntu gue masih kelas 6 SD, keren kan masih SD udeh bisa ngajar? Ngoahahaha *bukan HOAX cyiiin!*

Waktu pun berlalu dan selepas SD, gue kagak ngaji lagi di Taman Pendidikan Agama. Palingan kalo mau ngaji ya di rumah aje. Soalnye tiap sore gue kudu les Bahasa Inggris. Seusai les, pasti emak gue nyuruh gue ngaji di kamar dan kalo kagak dikerjain pasti guenye bakal diomelin abis-abisan.

Anyway, dari dulu gue demen banget dengerin ceramah ustad-ustad lewat kaset, radio, dan TV. Pas gue SD sih, gue paling demen mantengin AA GYM. Beuh, dulu ntu ye, diye terkenal banget cyiiin. SOULMATE mah KALAH!

AA GYM sih dulu terkenalnye karena tiap ceramah selalu menyejukkan hati. Cara doi ngemeng juga khas banget, sundanye ntu loh alus pisan! Sayangnye, kepopuleran doi sekarang udeh rontok karena doi ketahuan nikah lagi trus banyak yang ilfil, deh. Ya, namanye juga doi kan manusia biase ye, yang masih punya hawa nepsong jadi kepengen nikah lagi sama yang lebih muda. Azeg.

Layaknye seorang artis, seorang pemuka agama (apapun) sama, yaitu FARDU A’IN hukumnye menjaga sikap agar citranye selalu baek. Sekali bikin noda, maka berbondong-bondonglah jamaah berpindah ke pemuka agama laennye. Iye, kagak?

Meskipun poligami ntu emang dibenarkan oleh Islam, namun para jamaah kekeuh udeh males yang namanye mantengin AA GYM. Mereka beranggapan kalo AA GYM nikah lagi karena nepsong belaka, bukan hal-hal laen yang pernah dilakuin sama Rasulullah. Jamaah pun ilfil dan akhirnye media kagak mau mengundang AA GYM sebagai penceramah.

Selaen AA GYM, gue juga dulu ngepens banget sama ustadzah berinisial LS. Ustadzah yang juge uwaknye salah satu selebritis ini, dulu sering banget nongol di tipi dan beberapa media laennye. Bahkan doi menjadi konsultan agama di Majalah Hidayah yang menjadi langganan gue. Hampir di tiap kesempatan gue  mantengin ceramah doi yang penuh dengan ketegasan.

Pas SMA, entah kenape gue ngerasa ustadzah LS ini ngilang entah kemane. Jarang bener nongol di tipi. Palingan yang nongol kagak jauh-jauh dari penampilan alm Uje, Ustad YM, dan Ustad AI.

Kebetulan Sabtu lalu, gue cerite-cerite sama Pak dokter yang menangani gigi gue. Cerite-cerite tentang ustad-ustadzah di Indonesia gitu, deh. Dan gue baru tau banget kalo ustadzah LS sekarang kagak pernah nongol lagi karena citranye udeh jelek. Secara dikenal sebagai ustadzah yang demen kawin-cere. Gue baru tau banget, sumpeh. Dari situ, gue banyak kepo-kepoin forum untuk mengetahui kehidupan mendalam ustadzah LS.

ULS ternyate udeh pernah nikah 3 kali dan gagal semua. Sangat kontras dengan pekerjaannye yang dulu, yaitu sebagai konsultan agama, khususnye di bidang pernikahan. Ya namanye juga hidup, kagak segampang yang dikeluarin dari mulut....

Dam gue baru tau kalo ULS cere dengan suami ketiganye seusai mereka membina rumah tangga selama satu bulan sembilan hari. HEH? KAGAK SALAH? Kagak! Buset dah, bentar banget ye kayak gaya pacarannye ababil aje.

Ada beberapa alesan ULS tentang gugatan cerenye ke si suami. Pertama, karena mas kawin yang hanya sebesar 100 ribu rupiah ternyate belom dikasi. ULS bilang, di dalem agama Islam yang namanye mas kawin ntu musti dikasi ke istri, kalo kagak yang ada nanti jatohnye zina. Ntu diye yang bilang, loh. Gue juga baru tau sih sebenernye, hehe. Btw kebangetan bener masa mas kawin segitu doang kagak dikasi-kasi, dah?

Kedua, ULS bilang kalo suaminye ntu pengangguran dan kagak bisa dijadiin tulang punggung keluarga. Well, lagian kenape ye ULS nikah sama kakek-kakek berusia 60 taon lebih di kala ntu? Ya kan tau sendiri umur segitu mah kakek-kakek pengennye diem di rumah, bukannye kerja. Walau di luar sono, masih banyak sih kakek-kakek yang masih kerja, walau cuman jaga warung kayak kakek gue di Bogor.

Ketiga, ULS pernah keceplosan ngomong kalo suaminye ntu ternyate punya aib terbesar dan diye malu. Aib apaan, yak? Gue sempet kepikiran kalo si suaminye ini impoten, secara udeh kakek-kakek. Dan mungkin dugaan gue bener karena gue pernah baca di forum kalo salah 1 anggota disono pernah dibilangin sama temennye perihal ULS dan suami ketiganye yang kepergok konsul di klinik dr. Boyke. Hihihihi.  Wallahualam, sih.

Ketiga alesan tersebut sebenernye bisa dilalui kalo ULS mau bersabar dan berusaha. Soal mas kawin. .... Nah, sabar aje dah kalo si suami ternyate belom bisa kasi mas kawin, namanye juge pengangguran. Lagian salah sendiri kenape mau sama cowo pengangguran? Ya gue tau sih kalo mereka cuman kenal deket 3 bulan trus kawin, tapi ya kagak buru-buru ngebet mau kawin juge. Kayak anak mude aje, nih. Hihihihi.

ULS bilang, permasalahan harta diye kagak mempermasalahin. Diye merasa mampu karena memiliki cukup banyak harta pribadi. Nah kalo gue jadi diye sih, gue bakal kasi sebagian harta gue ke si suami buat dipakein modal usaha doi. Iye, kagak? Sama orang yang disayang ngapose pelit-pelit? Toh nanti keuntungannye buat kite (istri) nye juge. Betul?

Ada jamaah yang teriak kalo ULS ini emang dasarnye aje ganjen, jadinye kawin-cere mulu. Saking ganjennye, tiap diinterview pasti ULS maunye di-shoot kamera setelah doi dandan.

Hmmm, namanye juga cewe. Selalu pengen keliatan rapi, kan? 

Dan mungkin, ULS ini kagak ganjen. Doi kawin-cere karena emang lagi cari yang terbaek. Niat doi untuk menikah yang ketiga kalinye juga mungkin bukan karena alesan birahi. Karena umur senja kayak doi emang lagi butuh banget pasangan biar bisa diajak ngobrol di sepanjang sisa hidup. Iye, kagak? #PositiveThinking

Gara-gara ntu... popularitas ustadzah LS pun sirna....

Yah namanye juga hidup...

Di tahun 2009-2010an, setiap media berlomba-lomba untuk membuat program acara ceramah di kala pagi buta. Ada yang pake ustad lucu kayak si ustad M "Jamaah oh Jamaah", ustadzah Betawi-Sunda yang biase dipanggil Mamah, dan ustad-ustadzah laennye. 

Namun.... Gue ngerasa ngenes saat tiba-tiba ada sesosok siluman ustad di berbagai media. Kita sebut aje doi S.

Sebenernye sih doi bukan ustad. Doi adalah seorang pemaen salah satu sinetron dan disitu doi berperan sebagai ustad. Cuman akting doang, kok. Aslinye banget doi orang biasa kayak kite. Malah sebelom maen sinetron, doi adalah salah satu anggota FPI. Malah jabatannye ntu adalah Wakil Sekretaris Jenderal FPI. Bisa dibilang tinggi. 

Dari hasil kepo-kepo di beberapa forum, gue menemukan beberapa cerite kalo S ini pernah melakukan tindakan kasar kepada seorang kakek ketika S dan temen FPInye ngamuk-ngamuk ketika razia. Temen gue pun pernah ngeliat kejadian tersebut di dalem sebuah video yang kagak sengaja ditemuin. Lalu salah 1 anggota forum pernah bercerite kalo pas jaman kuliah dulu, skripsi S dibikinin sama dosennye. Bener kagak, ye? Wallahualam.

Banyak orang yang bertanye-tanye kalo S ntu pernah ceramah di media mane aje, sih? Perasaan jarang ngeliat doi ceramah. Seringnye nongol di inpotemen, malah! Sekalinye nongol juge yang berbau kontroversi dan pamer. 

Salah 1 dosen gue pernah membuat sebuah buku yang berisi cerite-cerite kehidupan artis. Salah 1 tulisan yang diulas adalah mengenai kehidupan seorang ustad tanpa nama yang selalu mengundang wartawan inpotemen untuk meliput segala persiapan pernikahannye. WHAT?

Ya meski di buku tersebut kagak disebutin nama ustadnye, entah kenape gue malah curiga kalo yang dimaksud dari buku ntu adalah S. Keinget pas nongton inpotemen dulu, selama seminggu ngomongin fitting baju S mulu. Cwape dueeeh!

Berbagai kontroversi juge sering dibahas di banyak inpotemen. Salah satunye yaitu soal S yang selalu pasang tarip ceramah. Padahal di dalem agama Islam, kagak boleh tuh yang namanye pasang tarip. Kalo emang jamaahnye mau ngasi, ya kagak masalah. Pokonye dari pihak penceramah jangan sampe memaksa dan mematok tarip, apelagi kalo taripnye tinggi.

Dokter gigi gue cerite, kalo temennye pernah ngundang S. Tapi si S-ye malah kagak dateng. Alesannye karena kenaikan tarip ceramah yang doi pengen kagak dijabanin sama panitia acara. Gue juga pernah baca soal ini di beberapa forum. Dan terakhir, ustad Novel yang pernah membahas hal ini di beberapa media.

Kalo misalnye kite nanya ke orang-orang, ustad mane yang fashionable bener, pasti jawabannye S. Apelagi kalo di media doi disandingkan dengan sang istri, beuh baju mereka pasti udeh di-matching-in, bok.

Btw kenape ye S tuh ngartis bener perasaan? Well, gue tau dari dosen gue yang juga orang media, kalo S ini udeh diatur dari manajemen. Terlebih dengan manajernye yang sayangnye kagak bisa ngebedain ngatur artis dan ustad. Oh iye, manajernye S katanye sih mantan wartawan salah 1 inpotemen, loh. Huiiiihh.

Emang sih jaman sekarang banyak bener manajer ustad-ustadzah yang rada gelo juge kalo matok tarip. Aji mumpung banget, gitu. Tapi dari banyaknye pemasangan tarip pemuka agama tersebut, emang yang parah mah S. Malah S disebut-sebut sebagai ustad dengan bayaran termahal di negeri ini. BUSEEEETTT!

Pemuka agama juga manusia. Kagak luput dari kesalahan. Seorang Nabi pun pernah melakukan kesalahan. Pokonye kalo emang ngerasa pernah melakukan salah, ya buru-buru diperbaiki aje dah ye. Semoga pemuka-pemuka agama laennye pada bisa ngejaga sikap dan citra. Soalnye kalo sikapnye jelek, ya citranye juga jelek. Kagak enak kan kalo ngeliat pemuka agama yang kayak begono? Selaen agama kite jadinye ikutan jelek, merekanye juge kesian jadi sepi job.

Ya begitulah resiko menjadi seorang pemuka agama, terlebih yang udeh terkenal gitu. Hehehe.

Dari sekian cerite kagak enak mengenai ustad-ustadzah sebelomnye, ada satu cerite mengharukan tentang seorang ustad ternama berinisial AI. Ustad ini dikenal sebagai jagoannye zikir. Pasti kalian tau, deh.

Ustad ini emang dikenal sebagai orang yang sederhana, kagak neko-neko dan kagak pernah masang tarip. Doi selalu ikhlas dikasi honor berape pun. Bahkan pernah loh doi dikasi amplop kosong dari panitia penyelenggara acara. Namun doi tetep sabar.

Karena keikhlasannye, doi pun selalu dihormati dan dihargai. Selalu diistimewakan deh pokonye. Bahkan pernah ada seorang pengusaha kaya di Kalimantan yang pernah ngasi ustad AI duit sebesar 400 juta rupiah! Loh kok bisa? Kata pengusaha tersebut, diye pengen membayar segala keihlasan AI aje gitu. Walau AI udeh berusaha menolak, namun tetep si pengusaha maksa agar AI nerima ntu duit. Bahkan selaen duit, AI dianter jemput dari Jakarta-Kalimantan dengan PESAWAT PRIBADI! WOOOW!

Kalo kata dosen gue nih ye, segale sesuatunye musti pake hati nurani dan keikhlasan. Soal materi, toh kagak bakal salah alamat. Mungkin kalimat tadi cucok bener bakal AI.

Oh iye, soal AI ini gue dapet ceritanye dari Pak Dokter Gigi. Kebetulan dokter gue juga menangani giginye ustad AI. 

Oke lah kalo begitu, sekian dulu ye cerita-ceritanye. Ambil hikmahnye aje, dah. Yang jelek-jelek dari mereka, dihindari. Yang baek, dilakuin. Iye, kagak?

MET MALEM MINGGU!!! ~~~