Oh Gini Rasanye Kebanjiran di Jakarta

banjir besar jakarta barat
Banjir di komplek Puri Indah, Jakarta Barat. Banjir serupa pernah terjadi di tahun 2002 dan 2007.
Malem tahun baruan kemaren tuh kan hujan yak. Bahkan dari sore sebelomnye gitu. Terus gue tidur kan tuh, sempet kebangun jam 3 dan masih kedengeran hujan. Pada jam-jam segitu, ipar ngetuk pintu bilang kalo di bawah udeh banjir. Gue yang saat ntu udeh kagak karuan dengan badan panas plus kepala sakit gila, terpaksa tetep meremin mata, kagak bisa liat kondisi di bawah, dan berharap bahwa banjirnye cuma semata kaki kayak 2 tahun lalu.

Sekitar jam 10 pagi gue bangun dengan kondisi badan lepek. Listrik udeh padam, dan pas gue liat kondisi di lantai bawah... WAGIDAW! Bener kata suami, kayak kapal pecah! Bahkan kayak kapal Titanic tenggelem tau gak!

banjir besar jakarta barat
Jam 10an air seperut gue di ruang tamu, kalo di ruang belakang udeh sedada huhu.
Ya Tuhan, seumur-umur baru kali ini gue kebanjiran! Well, selama 25 tahun gue tinggal di daerah Roxy kagak pernah kebanjiran. Dan selama 3 tahun tinggal di Puri Indah (rumah mertua), alamak, kagak pernah kena banjir separah ini! Paling juge semata kaki, itu pun cuma kena di ruang keluarga karena tinggi ruangan lebih rendah.

Lalu gue berkabar ke kedua adek gue, dan mereka bilang mau bantu evakuasi. Hebatnye lagi, rumah di Roxy kagak banjir sama sekali kata mereka, padahal di mane-mane udeh banjir kan tuh. Hebat benerrrr dah!

Semakin siang, perut pun makin terasa krucuk-krucuk. Kala itu, keluarga gue belom dapet bantuan. Alhasil suami ipar yang badannye paling tinggi di keluarga, inisiatif beli nasi Padang di warung yang jaraknye sekitar 800 meter. Masalahnye bukan masalah jarak, tapi kondisi air di jalan tuh parah banget. Di gang rumah kami aje sedada gue (tinggi gue 155 cm), nah kalo ke jalan besar air deras dan tinggi air lebih gila lagi. Derasnye air itu lho, kebayang kagak badan kudu sekuat ape buat nahan?

banjir besar jakarta barat
Motor kerendem gitu, huhu.
Udeh gitu dari teras, gue sempet liat uler panjang banget lewat segitu santuynye! Ngeri sih!

Pokonye waktu banjir di hari pertama tahun 2020 itu bener-bener bikin chaos Jakarta Barat. Listrik kagak ada, aer bersih kagak ada, makanan/minuman kagak ada, bantuan kagak ada, dan yang paling penting... SINYAL KAGAK ADA BROOOSISSSS!!!!

Terus hujan pun kagak berhenti. Sampe sore di tanggal 1 Januari 2020, langit masih ngucurin gerimis.

Adek pertama gue sih (doi relawan) bilang katanye mau evakuasi, eh pas gue lihat story-nye, malah cuman sampe Kedoya titik terjauh yang bisa doi tempuh. Kalo ke daerah Puri udeh kagak berani karena air masih tinggi. Lalu adek kedua gue sempet mau ke rumah sekitar jam 8 malem, terus pas lagi isi bensin di Shell Daan Mogot, eh katanye itu SPBU malah meledak dan doi hampir jadi korban ledakan. Terus doi bilang mau nyerah aje gitu, karena takut motornye kerendem banjir.

Yaudelah gue kagak maksa kan tuh (padahal udeh kelaperan huhu), eh tau-tau adek gue ada di Ranch Market, sekitar 1 km dari rumah. Tapi kondisi bener-bener kagak memungkinkan buat ke rumah gue, karena air masih tinggi dan kagak ada lampu yang nyala. Hujan gede pula sampe tengah malem. Adek gue pun menyerah. Huhuhu.

banjir besar jakarta barat
Kondisi rumah jam 9 malem, udeh rada surut. 
HARI KEDUA BANJIR (2 Januari 2020)

Air sih surut, tapi belom surut banget. Pas jam makan siang, adek sulung bersama salah satu temennye, ke rumah sembari menyalurkan nasi bungkus dan air mineral. Langsung aje gue pintain tolong buat nyalurin air dari tetangga sebelah (via keran garasi) ke ember di teras lantai satu rumah gue. Habis itu, air dibawa ke 2 kamar mandi yang ada di lantai yang sama. Gue sempet bantuin tapi abis itu langsung drop lagi, huhu.

Oiyak, sebelom ngambil air, gue udeh minta ijin ke tetangga via WA. Si tetangga lagi ngungsi ke rumah sodaranye. Pasca mereka tahun baruan di luar kota, mereka sempet mau balik eh tapi kagak jadi pas dikasi tau kalo rumahnye kerendem. Well, kebanyakan tetangga lagi kagak ada di rumahnye, ada yang lagi ke Singapur, Puncak, di rumah sodaranye, dst. Maklum, bencana hadir saat lagi liburan. Lucunye, banjir di marih merata banget. Mau kampung atau komplek elit kayak komplek rumah gue mah, semua kena coy.

Sebenernye cukup bersyukur rumah mertua punye balkon atas. Jadi, ape-ape bisa teriak ke luar. Kebetulan rumah deket pos hansip jadi bisa minta bantuan secara cepet. Misal, kulkas 2 pintu di rumah tiba-tiba mau menimpa badan laki gue (tuh kulkas semacem mau ngambang dan suami kagak kuat nahan beban kulkas). Langsung tuh mertua teriak minta tolong. Lalu tuh kulkas langsung dibawa ke bawah tangga dan diiket dengan tali rapia biar kagak jatoh. Sedangkan kulkas 1 pintu dibiarin ngambang wkwkwk soalnye mau diiket susah karena pas air surut dikhawatirkan malah tuh kulkas gedubrak gitu (eh ngerti kagak sih maksudnye wkwk).

banjir besar jakarta barat
Di luar rumah malah air lebih tinggi dari air di dalem.
Bau air banjirnye tuh aneh banget sumpeh. Kayak bau mayat kalo kata gue mah. Terus gue mikir, nanti benahin rumahnye gimane coba? Soalnye ni rumah tipikal maksimalis banget, barangnye banyak banget coy. Kagak cuman furniturnye, tapi perintilannye coy!!!! Di dapur aje ada ratusan piring dan mangkok kerendem. Pusing dah gue! Belom lagi peralatan dapur, barang-barang di gudang dapur, auk ah! Fix, emang udeh paling enak jadi generasi minimalis!

Di hari kedua ini, komplek nyediain persediaan listrik buat nyolokin hape di Ranch Market. So, suami gue dan suami ipar, langsung ke sono sembari bawa semua hape keluarga. Kecuali hape gue, karena kebetulan secara mengejutkan, powerbank gue masih ada sisa dan sukses ngisi batre gue sampe 70%. Maka dari ntu, pas banjir gue tetep bisa bikin status socmed.

Hingga hari kedua, gue masih melihat status socmed temen-temen yang saling menyalahkan lawan politisi junjungannye. Pokonye mau Anies Baswedan kek, Ahok kek, Jokowi kek, semua dibawa-bawa! Ape kagak ada empatinye ye nih orang, banjir masih ada di mane-mane, kalo mau salah-salahan tunggu banjirnye reda dulu kek! HUFFFTTT.

banjir besar jakarta barat
Relawan evakuasi di blok sebelah.
HARI KETIGA BANJIR (3 Januari 2020)

Banjir pun surut dan menyisakan lumpur-lumpur yang bikin pijakan jadi licin. Gue dan keluarga langsung bersih-bersih. Ya meski kondisi badan belom fit banget, gue tetep bantu bersih-bersihin lantai yang super kotor. Terus kaki gue langsung gatel-gatel dong, huhu. Tapi hal ntu kagak menyurutkan niat gue buat bebersih.

Dan tau kagak? Jadi ruang tamu rumah kan pake batu marmer, nah gue baru tau kalo batu marmer menyerap air banget. Banyak air banjir yang diserap, nah pas dibersihin dan dikeringin, jadi tuh air bakalan naik lagi. Dikeringin, ada air naik lagi. Kata salah satu tukang bersih-bersih, emang gitu batu marmer mah, malah harusnye kalo mau cepet kering kudu pake alat vakum khusus. Alamak, rempong banget! Pokonye peer banget ngurusin tuh ubin marmer!

Hari selanjutnye? Ya lanjut bersih-bersih yang laennye. Bersihin sepatu yang kerendem, bersihin baju-baju, dst. Pusyiiingggg!

banjir besar jakarta barat
Tangan gue sampe keriputan dan berdarah saking kebanyakan nyuci!
BANJIR JAKARTA, SALAH SAPE, DAH?

Menurut gue, ya semua bisa disalahkan. Mungkin kalian sabi lihat utas di bawah ini (coba klik sini untuk info lengkapnye lumayan panjang).

Nah, karena gue baru aje dapetin peringatan dini banjir dari BNPB, berikut hal-hal yang harus gue dan kalian lakuin (buat kalian yang kemaren sempet jadi korban banjir):

- Kalo kalian punye lantai atas, mending tidur di atas aje. Kalo tidur di bawah takutnye kagak sadar pas lagi tidur eh air udeh deras masuk ke rumah. Kemaren aje banyak yang kagak nyadar kan tuh, tau-tau udeh tinggi aje air masuk ke rumah.

- Selalu menyediakan makanan untuk ganjel perut di kamar / ruang atas. Plus aer galon. Semua ini buat jaga-jaga, takutnye pas banjir gede, kite susah untuk dievakuasi. Biar kagak cepet mati, ya at least makan makanan yang ada.

- Dokumen penting lebih baek ditaro di lantai atas. Kalo bisa dipakein ziplock. Biar aman.

- Harus banget punye powerbank minimal 10.000 mAh. Kalo udeh punye, buruan charger sampe penuh DARI SEKARANG!

- Jika hengpon lowbatt, segera dicas, sape tau banjir dateng dadakan. Hengpon sangat berjasa sebagai sumber cahaya, cari info, alat komunikasi, dsb.

- Di lantai atas, siapkan juge persediaan obat-obatan (obat pusing. obat maag, tolak angin, minyak kayu putih).

- Silakan cek lahan parkir dengan permukaan tanah lebih tinggi, biar pas air banjir belom gede, bisa langsung buru-buru parkir mobil. Oiyak kemaren mobil gue udeh diparkir ke tempat yang lebih tinggi etapi ternyate kena banjir juge huhu, alhasil sekarang mobil kudu diservis dan kudu keluar duit 10 juta. Pusing hamba.

Nah, buat kalian yang kepengen banget punye rumah di Jakarta dan sekitarnye, menurut gue mending pikir-pikir dulu dah. Mending punye rumah rada jauh tapi deket jalan tol atau stasiun, ketimbang punye rumah di pusat kota mahal-mahal tapi kena banjir terus.

Sekarang kondisi Jakarta makin memprihatinkan. Banyak wilayah yang biasanye kagak banjir eh jadi banjir. Ya abis gimane, tanah Jakarta makin abis buat bangunan. Bahkan tahun 2050 diprediksi Jakarta bisa tenggelam, huhu.

Kalo pun udeh ngebet banget pengen punye rumah di Jakarta dan sekitarnye, gue harap kalian bisa beli rumah dengan lantai atas. Sewaktu-waktu banjir gede lagi, bisa mengungsi di atas. Kalo bisa, peralatan dan perlengkapan rumah tangga yang dimiliki jangan terlalu banyak. Pusing coyyyy ngebersihinnye kalo kena banjir!

So, segini dulu cerita panjang gue seputar banjir pertama kali di Jakarta. Semoga Jakarta kagak banjir banjir lagi daaaaah!!!!!!!!

2 comments:

  1. Inget dulu di majalah bobo bilang jakarta tenggelam 2020 kak. Duh, pasti lelah banget ngeberesin semua kemaren, yg sabar y kk pin

    ReplyDelete
    Replies
    1. makasi sis, tenggelem sedikit demi sedikit ini mah

      Delete

Gih kasi komen. Asal jangan nyebelin, berbau SARA dan porno ye. Yang SPAMMING bakal gue HAPUS.

Makasi temen-temen. HAPPY BLOGGING! :*

Powered by Blogger.