Kena Tulah


“Pacaran yuk?”
“Ih, apaan sih, Om!”
“Yaudah, HTSan aja, gimana?”
“Ogah, aku kan masih abege. Kamu udeh om-om. Aku masih sayang sama si ituh!”

Percakapan di Yahoo Messenger! pada tahun 2011 ntu masih gue inget banget. Bahkan sampe sekarang masih bisa diakses percakapannye.

“Kamu mau cowok kayak gimana, sih?”
“Aku mau anak Trisakti, soalnye kebanyakan ganteng-ganteng!”
“Loh, aku anak Trisakti loh, anak hukum!”
“Tapi kagak sama Om jugaaaaak! Hmmm... aku mau anak UI, deh!”
“Aku kan S2nya di UI...”
“......”

Gile aje kan, yakali gue ditembak ame om-om. Beda 13 tahun, men. Idih... bayangin aje, pas diye umur 13 tahun, udeh mimpi basah dan mimpiin Miyabi, nah gue baru keluar dari perut, baru bisa owek owek doang. Yakaliiii, ogah ah, kejauhaaaan!

Kurang lebih selama 4 tahun, kite lost contact, entah karena ape. Setau gue juge, kite saling unfollow Twitter. Beberape kali ketemu di kopdar Naif Fun Club (NFC) atau kagak sengaje di toko kaset Sarinah, tapi kite kagak saling sapa. Entah diyenye lupa ape udeh males ame gue, entahlah. Yang jelas, gue sih bodo amat ye. Kagak penting juge sih tuh orang bagi gue.

Hingga suatu ketika, pasca gue balik dari Malang bulan Januari 2016 lalu... (dan abis berantem ame pacar gue yang di Belanda HAHAHA).

Tiba-tiba aje WhatsApp gue ada yang nyapa. Mending nyapanye kayak gini:

“Hai Pin, apa kabar? Masih inget aku, gak?”

Ini malah...

“Pengen ke Batu... ke tempat-tempat yang kamu datengin itu!”

Gue kan kaget yak. Terus gue ngecek Instagram gue, buset kebanyakan LOVE dari si om entah berantah ntu. Dan tiba-tiba, diye WhatsApp gue! Perasaan gue udeh ganti nomer, diye tau nomer gue dari mane, dah?

Kurang lebih begini dah ekspresi kaget gue -_- kagak lebay-lebay amat sih.

Yaudeh tuh, berawal dari situ, kite bercakap-cakaplah. Gue ceritain secara rinci tentang Malang dan Batu. Sampe kadang-kadang, si om suka modus, macem ngajakin ke acara pameran mainan atau nonton bareng gitu. Cuman sering gue tolak, selain karena lagi banyak kerjaan, gue juge masih LDR-an ame si pacar. Mencoba untuk setia. Kan kagak enak, udeh ‘diiket’ pake cincin ame si pacar sebagai komitmen, tapi guenye malah keluyuran ame cowo yang lagi mau modusin gue.

Bulan Februari 2016, gue sempet janjian ame si om, barengan kumpul-kumpul ame temen SMA. Wuih, setelah beberape tahun kagak ketemu.... oh begitu toh penampakannye. Masih aje kurus kerempeng. Terus kite ngobrol tentang rencana kite ke Malang. Iye... gue mau ke Malang ame diye! Kagak berdua sih, ame temen gue yang laen. Tapi ternyate... ujung-ujungnye temen gue kagak ikut. Untung ada si Rifqi, anak Kancut Keblenger yang tetiba mau joinan. Jadi, gue kagak ngerasa awkward ame tuh om-om.

Sempet sih gue nanya begini:

“Ke Malang ame bini dan anak aje, om!” kata gue.
“Aku masih single, kok...”

Anjir... bukannye diye udeh tua, ye? Kok belom nikah :o #eh

Bulan berikutnye, kite ketemuan lagi, sembari ketemuan ame anak Kancut Keblenger Jambi dan Palembang di Kota Kasablanka. Malemnye, kite nongton si Naif. Gue balik dianterin pake motor, sampe dicie-ciein ame si Tukul, om-om ngenes laennye. Apaan sih cie-cie, hati gue kan masih belom move on. Huhuhu. Posisi gue waktu ntu baru aje putus ame yang di Belanda. Pertama, karena gue kagak kuat LDR, gue haus akan pelukan. HAHAHA. Kedua, gue bosen LDR, gue sering banget perasaan tiap pacaran kok LDR mulu. Ketiga, doi bilang mau pindah kewarganegaraan dan kalo pun gue mau serius dengannye, gue kudu pindah juge, idih ogah deh!

Keempat, doi pindah keyakinan, jadi kagak mungkin gue ngenalin doi ke ortu kan. Kelima, doi terlalu kritis, jadi gue suka pusing kalo chat atau video call ame diye. Yaudehlah, gue bilang aje minta putus. Gue langsung bilang mau balikin cincin, tapi kata doi, kagak usah, disimpen aje buat kenang-kenangan. Tapi akhirnye gue jual, terus semua hasil penjualannye gue kasi ke salah satu badan zakat. Gue mau bener-bener move on, jadi berusaha untuk total, biar kagak baper :p

*ini kok jadi ngomongin mantan HAHAHA*

Singkat cerita... gue sama si om ke Malang. Dari Jakarta berdua, sampe Malang ketemu si Rifqi. Lalu kite langsung cabut ke Batu, stay di sono 3 hari. Selama di sono, gue sebel ame si om, soalnye modus mulu. Hari pertama pas si Rifqi lagi solat dan gue lagi dandan di atas ranjang dengan bantal di atas paha, tetiba si om naro kepalanye di atas bantal. GUE SHOCK LOH SUMPEEEH, KURANG AJARRRR, SAPE DIYE SIH?

Seriusan deh, gue marah banget, gue kagak suka digituin! Emang diye sape gue?

Langsung gue usir tuh om-om. Buset, berani amat! Noted, gue kudu ati-ati ame diye.

Besoknye, pas lagi nyanyi-nyanyi di atas ranjang bertigaan (duduk-duduk gitu loh, jangan ngeres!), si om naro kepala ke atas paha gue. Gue bilang, “Apaan sih om!” then he said sorry. Sial, masih aje modus!

Pas ke BNS, gue kan lagi duduk yak, terus si om nyenderin kepalanye dong ke pundak gue. Gue langsung menghindari, he said sorry again. Kampret. Gue langsung ngacir ke Rifqi, gue bilang kalo gue takut ame diye. Gue pegangan ame Rifqi, berharap tuh anak melindungi gue dari si om.

Pikiran gue cuman satu, gue pengen buru-buru balik. Gue takut ame tuh orang, suer :’(

Hingga di hari terakhir, gue kudu berpisah ame si Rifqi yang mau balik ke Jakarta duluan. Tinggallah gue dan si om berdua, yang berencana akan balik ke Malang karena keesokan paginye kite mau ke pantai bareng Kancut Keblenger Malang.

Well, sebenernye sih kala itu gue agak takut berduaan ame diye. Selama di Malang, gue nemenin diye makan di Museum Resto Inggil dan Toko Oen. Thats all, kagak kemane-mane lagi keburu udeh malem sedangkan besok subuh mau berangkat ke Malang Selatan. Seusai makan, ya kite langsung tidur.

Sekitar jam 3 pagi, gue bangun dan langsung mandi. Tapi, badan gue bener-bener kagak enak, terutama di bagian perut. Sial, asam lambung naik lagi. Kagak bawa obat dokter pula. Oke, gue yakin akan segera sembuh, gue coba tidurin lagi. Sampe jam 5, gue bolak-balik kamar mandi, muntah-muntah, sampe wastafel mampet. Gue coba tidurin, kagak bisa. Sampe gue minta si om beliin obat maag subuh-subuh, dan diye coba nyari dan beliin.

Mati gue mati... Di pikiran gue, gue bakal mati saat ntu juge :(

Anak-anak Kancut Keblenger Malang mulai pade hubungin gue, gue mau bales tapi gue kagak sanggup buat megang hape lagi, saking udeh lemes. Kepala udeh puyeng. Pas ditelpon ame mereka, gue sampe terbata-bata, gue kagak bisa ngomong lancar. Terus Ramy minta share location, gue kasi dah tuh. Sekitar jam 9 pagi, mereka kumpul di hotel, rame banget, mereka sampe ke kamar gue di atas (well, si om bobo di kamar bawah ye, kite beda kamar). Mereka panggilin ambulance buat bawa gue ke rumah sakit kecil di seberang hotel. Iye, seberang, tapi karena gue kagak kuat jalan, akhirnye dibawa pake ambulance. Sumpah, itu adalah asam lambung terparah sepanjang hidup gue!

Terus gue dirawat di RS itu. Setelah diperiksa, si Ashya suapinin gue pake bubur ayam. Baru dua sendok, gue minta udahan. Gue mual banget, suer. Perut makin parah. Akhirnye gue disuruh dirawat, diinfus segala. Disuruh nginep tapi gue kagak mau, karena sorenye gue kudu balik ke Jakarta, udeh beli tiket baliknye!

Lalu gue pun tidur... bangun... tidur lagi... bangun... tidur lagi... well, gue kagak bisa tidur nyenyak karena perut gue bener-bener udeh parah banget. Gue udeh 3 kali ganti infusan, tapi tetep ngerasa sakit di perut. Terus gue liat temen-temen Kancut Keblenger udeh kagak ada. Gue cuman liat si om di samping gue ketiduran, lalu bangun. Terus diye pegang tangan gue, ngelus-ngelus terus. Sambil senyum-senyum gitu.

“Kesempetan deh, tanganku dielus-elus terus!” kata gue ketus.
“Gak apa-apa, biar cepet sembuh!”

Setelah itu, tangan gue dicium-cium. Lama banget.

“Udeh berapa lama sih kamu gak pegang tangan cewe?”

Diye cuman senyum-senyum! Nyebelin banget!

Setelah agak mendingan, gue minta si suster cabutin infusan gue. Terus si om tiba-tiba nyium kening gue. Anjir....

Terus gue luluh, dong -_____-

Gue langsung keinget jaman-jaman 2011 dulu. Pas gue bilang pengen maicih (dulu susah banget didapetinnye!) terus si om bela-belain ketemu gue di tukang roti bakar deket rumah buat ngasi maicih.

Pas gue nonton konser Mocca dan bingung baliknye gimane, si om yang juge nonton Mocca (kite kagak janjian sih, ketemu di tekape), nawarin diri buat nganterin balik.

Pas diye nembak di YM...

Pas modus-modus...

Buset, nih orang agak gigih juge ye. HAHAHAHA.

Selama di kereta, gue tidur di pangkuan si om. Karena kudu selonjoran, di tengah perut yang masih sakit. Sampe Jakarta, gue dibawa ke rumahnye, disambut oleh nyokapnye.

"Aduh, badan kamu panas banget, ayo istirahat dulu baru mandi. Abis itu makan, ya..," kata nyokapnye. Wuih, si tante tampaknye welcome, nih.

Seusai mandi, gue makan dan disuapin ame si om. Kite lalu pelukan, agak lama. Gue nanya, "Jadi, kite sekarang pacaran, om?"

Peluk aku, ooom :3
"Jalanin dulu aja...," jawabnye. Ih, kok gantung amat, dah?

Malemnye, gue dianter balik ame si om. Selama di dalem mobil, gue merhatiin diye nyetir sambil senyum-senyum. Sesekali diye pegang tangan kanan gue sambil nyium-nyium. Hehehe.

Gue masih belom percaya banget sih, orang yang gue sebelin sekarang jadi pacar gue, nih?

------

Kagak berasa, gue dan si om udeh sebulan lebih jadian. Gue yakin, ini tulah. Pertama, gue pernah nolak diye dengan alasan karena gue kagak suka ame om-om. Kedua, you knowlah gue kan di socmed suka becandaan bawa-bawa Om Bambang, lah, Om Rudi, lah, dan laen-laen. Ntu becandaan doang sih, misalnye, "Duh lagi bokek nih, si Om Bambang belom teransper!" atau "Lagi nunggu jemputan lamborghini si Om Rudi, nih!"

Eh tauknye, gue pacaran ame om-om! HAHAHAHA. 

Mungkin banyak yang pengen nanye, ape rasanye pacaran dengan cowo yang beda usianye jauh banget?

Pertama, lebih ngemong dan dewasa. Sesuai dengan usianye sih :)) yang penting kagak manja, lah. 

Kedua, asik kok. Soalnye kite punye selera musik yang hampir sama! Kite pun bisa kenal kan gegara sesama penggemar Naif. Gue lupa sih awalnye gue bisa kenal ame tuh orang kayak gimane. Hehehe.

Ketiga, bisa jaga omongan. Janjian jam 7, teng diye udeh di sono. Malah gue yang suka telat hahaha! Tiap ada janji, suka ditepatin :)) yaelah beda banget ame yang dulu-dulu #eh

Keempat, entah kenape sekarang malah ngerasa klik banget. Banyak persamaan di antara kite berdua. Malah gue sering ngerasa diye itu kaca gue, beberape kebiasaan diye tuh sama kayak gue, hahaha. Udeh gitu, orangnye kadang suka kasi kejutan kecil, misalnye tiba-tiba ada di deket kantor, tau-tau ngebantu kerjaan gue, tetiba nelpon gue buat ngasi tau diye sibuk, misalnye, "Yangski, nanti kalo aku jawab WA kamunya telat, maap ya, aku ada acara sama temen-temen notaris." Terus kalo cerita, sama kayak gue, diye mau ngetik panjang-panjang, mungkin karena doi anak notaris kali ye kan demen ngetik. Yaaa kagak beda jauh lah kerjaannye ame gue, yang suka ngetik-ngetik ape gitu. 

Kelima, deg-degan. Soalnye kalo pacaran ame cowo berumur, istilahnye bukan cuman buat have fun lagi, tapi buat diseriusin. Kemaren sih kite udeh ngomong dari hati ke hati, kite berdua udeh saling yakin (amin). Tinggal minta restu ortu masing-masing. Kite juge udeh ngerencanain nanti mau nikahnye kayak gimane (amin, walaupun pake nada-nada becanda wkwk), mau tinggal di mane, mau punye anak berape dan kayak ape, mau desain rumah kayak gimane (kite sepakat pengen punye rumah dengan interior ala British), dan laennye. Sobat-sobatnye diye sih (mostly emak-emak hahaha, laki gue sobatnye emak-emak semua masa wkwk) bilang pade setuju hehe. Ape lagi kan si om ngepens banget ame Putri Titian, nah pas banget tuh gue kan 11-12 mirip Tian, wakakakakak.

Yang jelas, entahlah, gue kagak pengen lama-lama pacaran, karena gue tau ntu dosa. Pengennye sih ya serius segera, lah. Insha Allah, siap lahir dan batin. EAAAAKK.

Tapi, siapalah saya ini.... hanya bisa berharap :')

Sebelomnye, gue mau minta maap kalo ada jomblo yang rada kesel baca beginian. Muntah-muntah dah liat tulisan ini :))

Udeh ah, gue kagak mau bikin kalian baper :p

Thanks for reading!

16 comments:

  1. Duh, mulai sekarang kudu ati-ati nih kalo ngomong. XD

    ReplyDelete
  2. ya ampunnn, kita bener-bener ga tau apa yang bakal terjadi besok ya ka,,, cepe-cepet lah nikah biar halal hahaha
    dannn untung aku ga baper baca ini ;)

    ReplyDelete
  3. Kalau ginian mah gue ga bakal baprr. Wkwkw
    Moga disegerakan ye mpok..

    ReplyDelete
  4. oooh jadi gitu cerita lengkapnya... hmm hmmm *manggut-manggut*

    ReplyDelete
  5. Ya ampun...
    Baca tulisan kakak semacam WOW gitu. Dan jangan2 entar aku juga bakal berakhir kayak gitu...
    Jangan-jangan... (lagi maksa nolakin om-om)

    Tapi, semoga langgeng ya Kak...

    Btw,
    Malang membawamu ketemu orang yang 'klik' ya?!

    ReplyDelete
  6. ih akunya baper masaak, pas baca tangan mpok di cium ciumin sambil senyum senyum hahahahha XD
    semoga langgeng mpook

    ReplyDelete
    Replies
    1. emang laki lo ga pernah nyium tangan lo? :))

      Delete
  7. Gue embloooo,,, tapi udah kebal sama yang kayak begituan...

    ReplyDelete
  8. Huwaaa Mpoook ikutan seneng dengernya. :D Lagian tuh Om-Om kece juga, gak kayak Om-Om! :p

    Anyway, aku juga nikah sama Om-Om lho HUAHAHAHAHA. Dan apa yang Mpok Pina tulis sama apa yang aku rasain. :D

    ReplyDelete
  9. Aye juga pernah nyium..
    nyium tante tante..
    Bukan om om yah..

    Itu terjadi ketika aye
    pamit Mau Brangkat kerja..
    Iya itu tuh Tante Sendiri..
    hahaha..

    ReplyDelete
  10. hahahhaa...jadi inget pengalaman pribadi. Jaman sekolah Ga suka banget sama cowo mata sipit... eeeh 8 tahun kemudian dikirimin Allah laki laki ganteng bermata sipit yang jadi suami hingga saat ini. ahahahhaa

    ReplyDelete

Gih kasi komen. Asal jangan nyebelin, berbau SARA dan porno ye. Yang SPAMMING bakal gue HAPUS.

Makasi temen-temen. HAPPY BLOGGING! :*

Powered by Blogger.