Hal-hal yang Bikin Gue Ilfil Sama Temen Deket

Aku tuh sakit hati kalau dibohongi sahabat sendiri 😭 (Sumber Foto)

Dulu banget gue nganggep bahwa semakin banyak temen pasti bakal makin asik. Tapi emang dasar gue ye bukan tipikal yang bisa berbaur ke semua kelompok, jadi yaaa temen gue yang deket atau lumayan deket cuman ntu-ntu aje. Dan ngerasa, meski gue ketemu orang baru terus, bukan berarti gue menganggep mereka temen (kalo mereka anggep gue temen sih silakan wkwk). Abis gimane dong, kebanyakan fake dan bikin ilfil duluan.

Jujur ye pas sekolah, gue cuman bergaul dengan temen sekelas doang. Pas kuliah, ya temen gue cuman mereka-mereka yang pernah sekelas dan kebetulan nyambung diajak ngobrol (well, jaman kuliah susah banget nemuin temen yang nyambung). Pas magang yaaa maennye ame sesama anak magang. Pas kerja ya cuman yang satu tim. Susah banget buat berbaur dengan semua orang, ape lagi gue tipikal orang yang bisa banget bace karakter orang saat tuh orang ada di depan mata gue. Semacem 'ilmu' turunan gitu, deh. Dan jangan kalian tanye pegimane caranye. Karena sulit dijelaskan. Yang jelas, tebakan gue selalu bener. Dan sekalinye gue ngerasa tuh orang bakal bikin kesel di kemudian hari, maka gue akan jadi orang yang sekenanye aje di depan doi.

Pernah sih gue mencoba untuk buang jauh-jauh 'tebakan' negatif saat pertama kali ketemu orang. Terus gue deket kan tuh ame tuh orang, eeeh taunye 'tebakan' gue bener semua. Ketemu yang licik, suka ghibahin orang terdeketnye, dsb.

Beberape temen sempet gue anggep sebagai sahabat. Bagi gue sahabat udeh lebih dari sekadar temen deket. Kastanye udeh kayak sodara pokonye. Dulu sih gue punye 7 sahabat, tapi semakin lama, gue cuman menganggap 3 orang sahabat pade kehidupan gue sekarang ini. Bersama sahabat, semua aib, kebodohan, kejujuran, sama-sama dibagikan satu sama lain.

Semakin lama gue semakin menyadari bahwa harus hati-hati banget untuk bersahabat atau deket dengan seseorang. Biar kagak sakit hati, atau bahkan biar mereka kagak sakit hati dengan gue. Biar saling nyaman pokonye mah.

“Mpok Pina sukanye bersahabat atau deket dengan temen kayak gimane, sih?” 

Pertama, gue cuman mau seorang sahabat yang memiliki kejujuran. Ini paling krusial, sih. Soalnye gue pernah ada pengalaman nih, jadi ada temen deket yang bilangnye sih kagak bisa ketemu buat kerja kelompok karena doi kudu pergi ke luar kota. Eh taunye gue dan temen sekelompok lihat doi ada di emol deket rumah kite. Malesin banget kagak, sih?

Bukan ape-ape nih, gue mah sekalinye dibohongin, jadi susah percaye lagi.

Kedua, kagak hobi menilai buruk seseorang dan kagak sotoy dengan kehidupan temen deketnye sendiri. Menurut gue sih masih manusiawi kalo kite sesekali menilai seseorang buruk. Tapi kalo udeh hampir tiap hari menilai segala sesuatu yang kagak penting-penting amat, ngapain coba?

Misal, temen kite si X abis ngecat rambut warna kuning. Terus temen deket kite bilang, “Ih, si X rambutnye kuning kayak tai. Ngapain sih, kagak pantes ame mukenye yang udik begitu.”

Dih, ngapain coba komenin style orang, seterah doi dong!

Pernah suatu hari gue bilang mau resign dari kantor, eh malah dibilangin, “Lu udeh enak kerja di situ, ngapain resign? Ngapain lu di rumah, emang bisa cari duit? Emang lu sanggup sebulan dapet duit yang kagak seberape dibanding gaji lu sekarang? Lu mau jadi ibu rumah tangga sembari cari duit, emang lu sanggup gitu?”

Asli ye, gue kesel banget pas digituin. Bukannye kasi support dan doa. Kan ngehek. Belom tau aje di rumah gue masih bisa dapet duit!

Ketiga, kagak baperan. Gue pernah bikin status di instastory pake #kode dan #nomention eh udeh gitu malah doi yang ngerasa, dong! Doi bilang, “Lo nyindir gue?” Lah bingung gue mah, padahal kagak bermaksud nyindir doi. Terus pernah juge gue bikin tulisan ape gitu, terus doi ngerasa kalo doi lagi diomongin di tulisan ntu. PADAHAL GUE CERITAIN KISAH ORANG LAEN, BUKAN DIYE. Kenape sih baperan gitu, huhu. Kalo pun gue mau ceritain kisah doi, pasti gue bakal minta ijin dulu. Belom lagi pas gue bilang di socmed kalo gue kagak suka dengan seorang artis karena attitude-nye, eeh ternyate si temen ngepens banget ame si artis dan baper dong ngeliat gue ngekritik junjungannye wqwq. Ah males gue mah, udeh ah good bye aje, ketimbang bikin gue pusing! Pokonye gue ogah bergaul ame yang baperan!

Keempat, kagak punye gengsi gede. Tiap orang pasti suka hal-hal yang dirasa bergengsi. Tapi kalo ape-ape maunye bergengsi sedangkan duitnye ngepas, ya malesin juge kagak, sih?

Sobatan ame gue mah yang penting kagak neko-neko dah. Hidup udeh rumit jadi kagak perlu dipersulit (Sumber Foto)

Mau makan, kudu di restoran. Ngopi kudu di Sbux. Belanja bulanan di Foodhall, bukan di supermarket yang rada murahan. Kalo pake baju kudu beli di Zara. Beli make up kudu ke Sephora. Baru tanggal 7 udeh minjem duit. Abis itu ngeluh karena belom bayar cicilan ini itu. Huhu. Puyeng juge ame temen model gini.

Di lain waktu, gue sempet ilfil dengan temen yang kagak mau ngaku ke orang lain soal jaketnye. Bilangnye sih beli di emol, padahal belinye bareng gue di tempat baju bekas Pasar Senen.

Sumpe dah males gue dengan orang yang sok bergengsi.

Padahal ye, temen-temen deket gue yang lebih tajir aje kagak malu tuh beli baju di Shopee atau Instagram! Kagak sok-sok kudu branded. Diajak makan di kaki lima pun masih mau!

Kelima, kagak demen share hoax dan ujaran kebencian. Satu dua tiga kali nyebar hoax, gue masih bisa memaafkan. Namun jika hampir tiap hari, jenuh juge kale. Belom lagi kalo doi fanboy suatu politisi dan pemuka agama tertentu sampe kagak bisa dikasi kritik yang bener. Ih, malesin abis.

At least ada 5 poin yang krusial buat kenyamanan friendship bagi gue. Kalopun ada temen yang bikin ilfil, ape lagi yang deket banget, gue sebisa mungkin untuk kagak sok-sok sedih atau nyindir mereka di instastory kayak kebanyakan orang. Justru gue biasanye diemin aje, kalopun ada instastory sindir menyindir biasanye ke orang yang kagak saling follow di IG.

Kalo merasa kagak nyaman dengan Instagram temen, gue mute atau gue jadiin kite berdua sama-sama kagak saling follow lagi biar adil.

Kalo ketemu di dunia nyata, paling cuman say hello doang, kagak sampe berdua curhat-curhatan lagi. Kalo di-PM untuk minta bantuan kecil atau nanya sesuatu, masih selalu gue bales dan bantuin. Bahkan ada temen gue yang nyebelin banget kalo di socmed sampe gue unfriend di FB, tapi tetep suka ketemuan rame-rame dan tetep saling bertukar cerita. Kalo untuk berkomunikasi di keseharian, ya pikir-pikir lagi, deh.

Mohon maaf kalo tulisan ini bikin temen pembace ngerasa gue sok iye banget atau sok bener segala macem. Tulisan ini murni sebagai unek-unek dan kagak bermaksud untuk menjelekkan seseorang atau memperlihatkan bahwa gue sosok temen yang sempurna. Karena gue pun merasa kagak sempurna sebagai sosok sahabat atau temen bagi temen-temen gue. Demi kenyamanan bersama, ada kalanye gue merasa harus melakukan hal-hal tertentu. Kalo di socmed kagak saling follow/bertemen toh bukan berarti di luar sono kite musuhan.